ఆత్మహత్యల ఆదర్శీకరణ అవాంఛనీయం

ఇప్పుడు తెలంగాణా ప్రాంతంలో ఆత్మహత్యల పెరుగుదల ఆందోళన కలిగిస్తున్న అంశం. ఆత్మహత్యలు వద్దంటూ టిఆర్‌ఎస్‌ తదితర పార్టీల నాయకత్వంలో ఒక ప్రదర్శన జరిగింది. ఒక టీవీ ఛానెల్‌ చర్చ నిర్వహించింది. హౌం మంత్రి చిదంబరం కూడా ఈ సమస్యను ప్రస్తావించారు. ఈ ఆత్మహత్యలకు ఎవరు కారణమనే దానిపైన, ఎవరు ఏమన్నారనేదానిపైన కూడా వివాదాలు నడుస్తున్నాయి. ముఖ్యమంత్రి తనకు ఆపాదించిన వ్యాఖ్యలను ఖండిస్తూ ప్రకటన చేయాల్సి వచ్చింది. ఈ విధంగా ఆత్మహత్యలపై అందరూ ఆవేదన వ్యక్తం చేస్తున్నారు. అయితే రాజకీయంగా సామాజికంగా వాటి మూల కారణాలు శోధించి నిరోధించడం అన్నిటికన్నా ముఖ్యం. ఉప ఎన్నికల ఫలితాలు గమనించిన వారంతా ఉద్వేగాలు ఉద్రేకాలు కాస్త తగ్గుముఖం పట్టి సాధారణ రాజకీయ వాతావరణం ఏర్పడుతున్నదని భావించిన తరుణంలో ఈ పరిస్థితి రావడం నిజంగా బాధాకరం. ఒక ప్రతికూల పరిణామం. చనిపోయిన వారి పట్ల సానుభూతి తెల్పుతూనే రాజకీయ ఉద్యమాలలో ఆత్మహత్యల చర్చ కేంద్ర బిందువుగా మారకుండా జాగ్రత్తపడాల్సి వుంటుంది. ఈ ధోరణి కేవలం తెలంగాణా సమస్యకే పరిమితం కాదు గనక రేపు మరో సందర్బంలోనూ ఇలా జరగొచ్చు. అది కుటుంబాలకు సమాజానికి కూడా శ్రేయస్కరం కాదు.కనక పదే పదే అసహాయ భావనతో ఆత్మహత్య చేసుకున్న వారిని ఆదర్శీకరించే వైఖరి రాకుండా ఆయా సంఘాల , పార్టీల నాయకులు చూసుకోవాలి.బలిదానాలు వంటి మాటలు మీడియాలో ఎక్కువగా వాడుతున్న తీరును కూడా పున: పరిశీలించుకోవాలి. ఎవరైనా తప్పుగా మాట్లాడితే ఖండించాలి గాని దాని వల్ల ఆత్మహత్య చేసుకున్నారని పదే పదే చెప్పడం ఒక విధంగా సమర్థనగా కనిపించవచ్చు.కొందరు స్వార్థపరులైన వారు ఒక వైపున ఖండిస్తూ వద్దని సలహాలు చెబుతూనే వాటి చుట్టూనే చర్చ తిప్పుతుంటారు. ఇదే కాలంలో రెండు వేల మంది రైతులు ఆర్థిక అవస్తలతో ఆత్మహత్య చేసుకున్నారు. ఇంకా ఇవి కొనసాగుతున్నాయి. అంతకు ముందు చేనేత కార్మికుల కుటుంబాలలోనూ ఆకలి చావులే గాక ఆత్మహత్యలు చూశాం. ఆ అన్ని ఘటనలలోనూ సంబంధిత సంఘాలు ఆత్మ విశ్వాసం తప్ప ఆత్మహత్యలు పరిష్కారం కాదని చెప్పాయే తప్ప దాని చుట్టూ చర్చ నడవలేదు. ఇప్పుడు మాత్రం గల్లీ నుంచి ఢిల్లీ వరకూ ఏ చర్చకు కూచున్నా పిల్లలు చనిపోతున్నారంటూ మొదలవుతున్నది. ప్రాంతీయ వాదాలతోనే పిల్లలు ప్రాణాలు తీసుకునే పరిస్థితి సాగనిస్తే రేపు మరింత తీవ్రమైన వ్యక్తిగతమైన సవాళ్లు వస్తే వీరు తట్టుకోగలుగుతారా?విభజన జరిగినా జరక్కపోయినా అది ప్రాణాలు తీసుకోవలసినంత మౌలిక సమస్య కాదని, దాంతోనే జీవితాలు తలకిందులుగా మారిపోవని కూడా మన యువతకు స్పష్టమైన అవగాహన కలిగించడం అవసరం. ఏ సమస్యకైనా ఆత్మహత్య తరుణోపాయం గాని సమర్థనీయం గాని కాదు. లోగడ ఇలాటి ఒక సందర్భంలో చనిపోయిన యువకుడిని జెఎసి చైర్మన్‌ కోదండరామ్‌ భగత్‌ సింగ్‌తో పోలిస్తే నేను ఖండిస్తూ రాశాను. పైగా భగత్‌ సింగ్‌ ఆత్మహత్య ఏ పరిస్థితుల్లోనూ తగదంటూ రాసిన భాగాన్ని వుటంకించాను. తర్వాతి రోజు నమస్తే తెలంగాణాలో నేనిచ్చిన కొటేషన్‌ను పునర్ముద్రించడం సంతోషం కలిగించింది.కనక వద్దనుకుంటూనే ఆత్మహత్యలతో విమర్శలు ఆరంభించడం మానుకోవాలి.అలాగే ఆత్మహత్య చేసుకున్న వారి వ్యక్తిగత నేపథ్యాన్ని పరిసరాలలో పరిస్థితులను కుటుంబాల తీరు తెన్నులను నిశితంగా పరిశీలించేట్టయితే భవిష్యత్తులో నిరోధించే చర్యలు తీసుకోవచ్చు.