మోడీకి కితాబు... అద్వానీకి జవాబు!

గుజరాత్‌ ముఖ్యమంత్రి నరేంద్ర మోడీ సమర్థతకు మారు పేరు అని అమెరికా కాంగ్రెస్‌ రిసెర్చి విభాగం పెద్ద నివేదిక నివ్వడంపై ఆయనతో సహా ఆ పార్టీ ఆనందోత్సాహాలలో మునిగిపోవడం సహజమే. ఆరేళ్ల కిందట అమెరికా ఆయనకు వీసా నిరాకరిస్తే అన్ని పార్టీలూ ఖండించాయి. తర్వాత కాలంలో ఆయన విధానాలలో గాని ఆలోచనల్లో గాని ఏ మార్పు వచ్చింది లేదు. అయినా అమెరికా ఇంతగా పొగుడుతున్నదంటే అవసరాన్ని బట్టి మార్చుకున్న వ్యూహమై వుండాలి. మోడీకి తమ ఆమోదం వుందన్న సందేశం పంపించడమే వారి ఉద్దేశం. ఇతర పార్టీల సంగతి ఎలా వున్నా మరోసారి భారత యాత్ర ప్రకటించిన మహా రథికుడు అద్వానీకే ఇది అశని పాతం. ఎందుకంటే
అవినీతికి వ్యతిరేకంగా యాత్రం అంటున్నప్పటికీ రాబోయే ఎన్నికల్లో ప్రధాని అభ్యర్థిగా తాను వున్నానని సంకేతం ఇవ్వడానికే అద్వానీ ఈ కార్యక్రమం తలపెట్టారన్నది సకలజనాభిప్రాయం. అమెరికా కితాబు తర్వాత మోడీ రాబోయే ఎన్నికల ప్రధాని అభ్యర్థి అని ఆయన అనుకూలులు హడావుడి మొదలెట్టారు. అయితే విచిత్రమేమంటే మోడీతో పాటు మరో సమర్థుడుగా కితాబు పొందిన బీహార్‌ ముఖ్యమంత్రి నితీష్‌ కుమార్‌ కూడా మోడీని ఆమోదించరు! తమ ఎన్నికల ప్రచారానికి మోడీ రాకూడదని షరతు పెట్టారు.బహిరంగ వివాదమే నడిపించారు. ఎన్‌డిఎలో మిగిలిన ఒకే ఒక పెద్ద పార్టీకే మింగుడు పడని మోడీ అభ్యర్థిత్వం విశాల ప్రజా రాశులకు నచ్చుతుందనుకోవడం అవాస్తవికం. వాస్తవానికి బిజెపిలోనే దీనిపై ఏకాభిప్రాయం లేదు. మోడీ ఇంకా కొంత కాలం నిరీక్షించాలనే ముఖ్యులైన బిజెపి నేతలు అంటుంటారు. ఈ దృశ్యాన్ని ఇంకా చికాకు పర్చడానికే అమెరికా కితాబు కారణమవుతుంది.మోడీని నాటి కేసులు ఇంకా వెన్నాడూతూనే వున్నాయికాంగ్రెస్‌ ఎంపి తో సహా 32 మంది హత్యకు సంబంధించిన కేసులో సుప్ర్రీం కోర్టు విచారణకు నిరాకరించి కిందకు పంపిస్తే అదే పెద్ద విజయంగా ప్రచారం చేసుకోవడం చట్టరీత్యా నిలిచేది కాదు. అవినీతి అంటే కేవలం డబ్బు తీసుకోవడమే గాదనీ,వేలమంది బలికావడానికి కారణమైన మతతత్వ రాజకీయాలు కూడా అంతకంటే తక్కువ కాదని మోడీ భజనపరులు తెలుసుకోవాల్సి వుంటుంది.